Damn this is good!
Billie Jean (by gordonmayer)
Pungut Mantu - Firman Muntaco
p.p1 {margin: 0.0px 0.0px 0.0px 0.0px; text-align: justify; text-indent: 48.0px; font: 12.0px Arial; color: #666666} p.p2 {margin: 0.0px 0.0px 0.0px 0.0px; text-align: justify; text-indent: 48.0px; font: 12.0px Arial; color: #666666; min-height: 14.0px} p.p3 {margin: 0.0px 0.0px 0.0px 0.0px; text-align: justify; font: 12.0px Arial; color: #666666} p.p4 {margin: 0.0px 0.0px 0.0px 0.0px; text-align: justify; font: 12.0px Arial; color: #666666; min-height: 14.0px}
Begitu senja yang butek ngeloyor liwat, dan maghrib yang remeng bures dicaplok malam, maka dipelopori bunyi geledek pating blegur seperti bunyi meriam sundut jaman baheula mendadak ngocorlah hujan yang sangat sarat seperti air tempayan diseblokin dari langit yang tiada bertiang
”Konci deh tu’ pintu ame jendela-jendela biar rapet!” kata Pak Barong kasi komando kepada bininya yang kayak kalong wewe, sementara si Iyum, anak perawannya yang semata wayang, lagi repot jentrak-jentrik sembari dongdong kaleng kosong buat menadahi ketelan air hujan yang meleleh bocor dari loteng.
Klar semua-mua, dan malam diluar bertambah medok diubrak-abrik sang ujan yang sekarang ganti bulu menjadi gerimis yang bandel melilit-lilit, maka duduklah pak Barong di bale banding berdua bininya buka obrolan, sedang si Iyum di pangkeng sudah ngorok celentang sembari mangap mulutnya kayak lobang kepundan gunung Agung.
”Ngomong-ngomong urusan si Iyum pegimane sih tuh?” kata Pak barong mulai buka”klima” sambil garuk pahanya yang digigit bangsat.
“Apenye?” sambut bininya sembari nyisik.
“Apenye lagi kalu bukan urusan…kawinnye?”
“Ooooh…- bininya lantas samber tempolong dari kolong bale terus meludah
“O’oh, gue juga rade-rade selempang, apa iye die bakalan ketemu jodonye? Nage-nagenye sih sepi….!
“Na, abang pikir dong, boro-boro besuka’an bergaul ame perjaka juga die kagak. Abisnya gitu sih tu’ anak, jadi perawan kok pemalu’an be’eng. Ke warung emoh ke pasar mbung. Heran! Bisanye cendekem di rume doang, inget-inget kaye kiong kondang. Coba tuh, ude sekolahnye macet, ngajinye mandek, eh keluar rume juga jarang…
“Tuh die!” sahut Pak Barong semben cabut siwaknya.
“Gue pikir-pikir, daripade die begitu-begitu aje, kan mendingan kite cari’in timpalannye. Tul enggek? Sebab gue kuatir sih, “nti ujung-ujungnye tegor kagak, nyang colek euwuh! Na, kalu ude gitu, runyam dong, abisnye ‘ni harte bande kita nyang begini luber siape nyang bakal urusin?
“Aih, Iyum,iyum”
